ELIKATZEKO FAKTORIA
Tokikoa eta ekologikoa kontsumitzeko.

FAKTORIAKO EKONOMATUA, DENDA BEZALA IXTEA ERABAKI DUGU.
Tokikoak eta ekologikoak diren produktuak eskuratzeko bideak baina, ez ditugu itxiko, are, berriak ere irekiko ditugu. Modu horretan, eskaera bidez, astero-astero egongo gara zuen etxeetako hozkailu eta despentsetan, geure elikadura sistema aldatzen jarraitzeko tresna berriak eskainiz.  

 

Nola funtzionatuko du orain ekonomatuak?

1 · Online eskaerak

Astero-astero produktu freskoak (barazkiak, fruta, ogia, goxoak, esnekia eta okela ere) eskatzeko aukera izango dugu www.ekonomatua.eus webgunean. Eskaerak igandea baino lehen egin beharko ditugu, eta ostiralean Faktorian jaso edo etxera eramango dizugu bazkide laguntzaile sare kolaboratiboaren bidez! 


2 · Astero eskaintza berezi bat

Astero etxeko despentsaren atal bat betetzeko eskaintza luzatuko dugu (orain lekaleak, orain zekaleak, orain garbikariak...), erosketa kolektiboen sistemara gerturatuz. Gainera, planifikazioa errazteko, hilabeteko aurreikuspenaren berri emango dizuegu.


3 · Osasuntsu eta merke!

Gainera, eskaera bidez lan egingo dugunez gero, ez dugu mermarik izango, eta beraz, produktuak orain arte baino merkeago eskuratzeko aukera izango dugu aurrerantzean (ekoizlearen prezioari markin oso txikia ezarriko baitiogu): ekologikoa eta tokikoa kontsumitzea eskuragarriago egingo dugu beraz!


4 · Saski errepikariak. Zeeer?

Saski errepikariaren aukera ere ahalbidetuko dugu! Eskaera astetik astera egin beharrean, "niri 30 euroko saski bat prestatu astero!" esan ahal izango duzue, eta bertan sartuko dizugu fruta apur bat, garaiko barazki batzuk, esnekiak eta aste horretako eskaintza bereziaren produkturen bat ere, zurekin hitzartuko dugu noski zenbateko saskia nahi duzuen, bai eta zertan duzuen preferentzia ere.


EGIN ESKAERA

Saski errepikari bat nahi dut.

Kosta egiten zait egunerokotasunean erosketak behar bezala kudeatu eta programatzea, baina Ekonomatuaren laguntzarekin erosketa osasuntsu, justu eta nutritiboki orekatua eskuratu ahal izango dut. Deitu nazazue eta hitzartuko dugu zer-noiz-nola.

Ez zara online eskatzeko zalea?

Lasaaaaai! www.ekonomatua.eus webgunean eskaera egitea oooso erraza da, baina ez baduzu nahi, ez baduzu horrela egitea maite edo eta intsumiso teknologikoa bazara, beste bide batzuk proposatuko dizkizugu .

Etorri!

Etorri Faktoriara kafe bat hartzera, eta bertan dagoen langilea lagunduko dizu eskaria online egiten! Astelehenetik-ostiralera 17:00-20:30etara zabalik gaude, eta larunbatetan 10:30etatik 14:00etara.

Whatxapa!

 Whatsappez nahi duzula egin? Ederto bada, bidaliguzu mezutxo bat gure telefonora, eta esaiguzu idatziz edo audio bidez ere, zer nahi duzun, geronek prestatuko dizugu eskaera! Ñam-ñam!

Telefonoz!

Hala nahiago baduzu, telefonoz deituko zaitugu astetik-astera, eta zer eskaintza dagoen esango dizugu, zuk hurrengo asterako eskaera telefonoz egin dezazun!

Saskia!

Aurreko aukera guztiak ez badituzu gustoko (apur bat exijentea zara e!), lehenago aipatutako saski errepikariaren aukera ere hor duzu :)

Noiz eta nola jasoko dut nire eskaera?

Bi aukera izango dituzu, baina beti-beti ostiraletan izango da!

Faktoriara etorri!

Lehenengoa, guretzat ederrena, Faktoriara etortzea ostiraletan, eta bertatik bertara elkar-ikusi, zure iritzi zein proposamenak entzun, eta elkarrekin zeozer hartzeko ere probestuko dugu bisita.

Gainera, aurrerantzean ostiralak Faktoriako plaza egunak izango dira, gure komunitate txiki eta ederra elkartzeko egunak; jateko, edateko, jolasteko, dantzatzeko, solasteko egunak... Ostiralero doako jarduerak  topatuko dituzu aterpe eder honetan, eta nola ez, zure saskia ere!

Eramango dizugu etxera!

Baina bai, ulertzen dugu barikuak egun lanpetuak direla, plan asko ditugula ohikoan, eta Laudiorako eskapada egitea ez dela horren erraza. 

Ez kezkatu, geronek eramango dizugu etxera! Bazkide laguntzaile sare ezin ederragoa dugu olagarroak bezala, eskualdeko herri guztietara arteko tentakuluak dituena, eta pozik hurbilduko gara zugainaino!

AZAROA

Urriak 29ra arteko eskaeretan:    

  • LEKALEAK: Txitxirioak, dilistak, indaba zuri zein gorri
    ak....

  •  + TXERRI OKELA: Basatxerri, libre hazitako txerrien okela

     

  • Azaroak 5era arteko eskaeretan:

    •  ITXINAPEKO OKELA: Orozkoko Albitzu auzoko txahal okela.

    • GARBIKARIAK: Lucart eta Garbilabelek hornitutako garbikari ekologikoak: Txahal okela

       

Azaroak 12ra arteko eskaeretan:

  • PRODUKTU BARAZKIJALEAK:  Arabako Zuaitzo etxeko barazki produktuak


    + ZITUENE PASTA: Oreretako pasta ekologiko artisauak

      

  • Azaroak 19ra arteko eskaeretan:

    • OILASKOA: Oleta Baserriko oilasko ekologikoa


      + OLIOA ETA KONTSERBAK: Nafarroako olio eta kontserba ekologikoak

        

Faktoriako ordutegia: 


Astelehenetik barikura:  17:00etatik 20:30etara

Zapatutan:  10:30etatik 14:00etara.

Bisita gaitzazu eta egin zure eskaera bertatik bertara!

Jaten duguna gara

Ekonomatua,  tokikoak eta ekologikoak diren elikagaiak kontsumitzeko eta erosteko espazioa,  2020. urte hasieran sortu zen.  Aiaraldea Kooperatibaren pean ELIKADURA BURUJABETZA lantzeko tresna da, eta elikadura burujabetza eta agroekologia lantzea du helburu.  

Ekonomatua kooperatibaren egoitza sozialean dago, zehazki Laudioko industrialdean dagoen Aiaraldea Ekintzen Faktorian. Faktorian, dendako azpiegituraz gainera, sukaldea eta kantina ere badaude, jateko eta edateko eskaintza zabalarekin, aste bitartean zein asteburuetan irekita. 

Espazio fisikoaz haratago, online espazioa ere badaukagu. Bertan, erosketak egiteko ONLINE DENDA, GERTAKIZUNEN AGENDA eta beste hainbeste aurkituko dituzu.

TOKIKOA

Tokikoa kontsumitzean,

  • TOKIKO EKONOMIA SUSTATZEN dugu, eta ekoizleek egiten duten lana balioan jarri. 

  • ELIKAGAIAK FRESKOAGOAK dira, erosketak ekoizleen eskuetatik gureetara pasatzen direlako zuzenean.

  • Elikagaien bidaiak murriztea INGURUMENAREKIKO JASANGARRIAGOA den kontsumitzeko era bat da.

EKOLOGIKOA

Ekologikoa kontsumitzean, 

  • EKOIZPEN MODU JASANGARRIAK sustatzen ditugu.

  • ELIKAGAIEN ZAPORE goxoa bermatzen da, kimikorik  eta transgenikorik gabeko ereite eta ekoizte prozesua bermatzen delako.

  • OSASUNGARRIAGO jaten dugu.

ERALDATZAILEA

Balioetan oinarritutako kontsumo-prozesuak aintzat hartzen ditu elikadura kate osoan inplikatuta dauden pertsonak eta haien lan egiteko erak. 

Horrek, aldi berean, eragina du norbanako bakoitzaren ekonomian eta osasunean. 

Kontsumitzea, hortaz, apustu kontua bihurtzen da, eta guk tokiko eta ekologikoen alde egiten dugu.


Animatuko zara kontsumitzeko era eraldatzaile batean murgiltzera?


Denda online, 24 orduz irekita 

Gure produktuak egunean 24 orduz eros ditzakezu.

Online dendan zure eskaria igandea baino lehenago osatu eta etxean edo ekonomatuan jasoko duzu hurrrengo asteko ostiralean.

EGIN ESKAERA

Catering agroekologikoak

eskaintzen ditugu


Ezagutu gure zerbitzua

Erosketa etxera eramateko baldintzak:

Bizimodu desberdinek kontsumitzeko aukera desberdinak eskatzen dituzte. Ezin baduzu gurera etorri, lasai, zurera hurbilduko gara.

Etxez etxeko banaketaren kostua:

  • Aiaraldea Kooperatibako BAZKIDEEK doan izango dute etxerako banaketa Laudio ez den udalerrietan, betiere 30 euroko gutxieneko erosketa egiten badute (gutxienekora iritsi ezean, 3€ kobratuko dira etxera eramateagatik). 

  • Kooperatibako BAZKIDE EZ DIRENEK ere doan izango dute etxerako banaketa zerbitzua, baina hauen kasuan gutxieneko erosketa 50 eurokoa izango da (gutxienekora iritsi ezean, distantziaren araberako gastua izango du).

Gogoratu etxez etxeko zerbitzua izateko, IGANDE GAUA baino lehen egin beharko dela eskaria. Banaketa egunak osteguna eta ostirala dira. 

 


Garaian garaikoa 

Kontsumitu garaian-garaikoa,

tokian tokikoa!


Deskargatu hemen egutegia kalitate onean